余文樂日前喺上海出席電視劇《鄧小平．1928》記者招待會，阿樂今次參與呢部紀念前國家領導人鄧小平誕生一百周年的電視劇，重孭重飛飾演鄧小平助手薛蒲生，佢接受訪問時話：「導演睇咗《無間道》之後，覺得我做卧底好出色，所以今次搵咗我，而我喺劇裏面都係做卧底。」
阿樂喺劇入面重會有啲犧牲，就係要將頭髮剪短晒，阿樂話：「唔知點解每次想留番長啲頭髮，就會有戲搵我，重要我剪短晒啲頭髮，今次我後面要鏟青，導演重特登嚟監工！」
而喺記者會上就發生咗一段小插曲，由於阿樂今次係《鄧》劇裏面唯一嘅香港演員，難免成為當日嘅焦點。
當日有大批記者到場採訪，而大部份都爭住同阿樂影相，幾個記者最初口角繼而動武，見到場面混亂，阿樂嚇到呆咗，只好喺隔籬勸交，但係場面依然混亂，最後大會見勢色唔對，就中斷咗記者會，等大家平復落嚟先再開始。
鄧健明同黃丹儀噚日去商台接受訪問，佢哋最近出咗一隻碟，包埋有結他同鋼琴樂譜。鄧健明話暫時未有準備開班授徒，因為覺得教學生太過困身，雖然曾經有唔少人都叫過佢咁做，但係佢一定唔會應承，最多只係會教對方一兩次就算。
噚日有雜誌影到陳慧嫻同男友去上海玩，重影到佢腹部微隆，而且行路嗰陣不時托腰，動靜十足十大肚婆，馮仁昭聯絡咗慧嫻嘅經理人Ba叔，佢話慧嫻百分百冇大肚，只係肥咗啲，而且上個禮拜六佢喺上海出席一個騷嗰陣，重表演跳欄，如果慧嫻有咗，咁又真係冇理由冒咁嘅險嘅。
陳凱歌嘅《無極》同張藝謀嘅《十面埋伏》一直以嚟都係焦點，宣傳攻勢亦實行大鬥一番。張藝謀喺下月十號會舉行全球首映禮，而陳凱歌都唔示弱，今個月中喺雲南舉行一個有四萬人參加嘅開機儀式，到時除咗張東健、真田廣之外，謝霆鋒同張栢芝都會齊齊出席。
蔡少芬早前為寵物雜誌《貓生活》拍攝封面，雖然Ada屋企只有一隻約瑟狗，但係影相當日，Ada一見到貓就十分雀躍，Ada話：「我都有考慮過養貓，不過唔知屋企隻狗可唔可以同貓相處到，因為隻約瑟狗好鍾意搞啲貓。」
