經過一個災難般的球季，皇家馬德里今次早早公布下季備戰秩序，有傳因為要踢歐冠盃外圍賽而受阻嘅亞洲之行，亦決定喺日本踢兩場友賽，而且重早過巴塞隆拿到東瀛，實行搶飲頭啖湯。
皇馬決定七月二十七至八月一日逗留日本踢兩場，其他亞洲地區之行計劃未有定案。皇馬淨係決定日本之行，除咗球迷多兼市場大，相信同死敵巴塞隆拿今夏又係到東瀛踢表演賽有關。巴塞公布完成七月二十九日漢城之行後，跟着會飛去東京同靜岡，即係皇馬就早巴塞兩、三日到日本。重有，如果皇馬第二場友賽喺八月一日踢，會同巴塞一樣，到時兩隊西甲勁旅喺同日踢友賽，季前經已鬥到底，下季兩隊肯定鬥餐死。
收到風，拉素十二個現役或者已離隊球員合資買咗總值約一百萬鎊（約一千四百萬港元）嘅球會股票，協助球會解決財政問題，而且類似行動聽講會陸續有嚟。雖然數目唔算好多，但一諗到拉素球員近年經常被球會拖糧，都堅持交出好成績，𠵱家重肯「慷慨解囊」，都算有情有義啦。
巴西後衞洛基祖利亞噚日對阿根廷頻頻甩漏，好彩佢夠運，唔係隊友包番就係敵將唔爭氣錯失機會；而佢每次傳波上前幾乎都係交畀對手。查實佢之前無論踢英超列斯或意甲錫耶納都失失慌，真係唔明點解重獲器重。據聞德甲冠軍雲達不來梅都想斟佢，行晒大運嗰隻款喎。
摩連奴正式成為車仔領隊，未來肯定成為焦點；有博彩公司經已開出好多特別盤口，其一係聖誕節前佢俾人炒魷賠率為六倍。我求大俠覺得機會唔大，摩連奴簽長約，周薪又成十萬鎊，「車仔」要賠唔少錢先送得佢走。反而博吓有約球員中格朗基亞最快離隊重抵玩，有三倍㗎。
基羅斯執教咗皇家馬德里只有一年就俾球會炒咗，但係呢位南美教練好快搵到新工；不過估唔到嘅係佢會食「回頭草」返曼聯做費格遜助手，今個星期會簽兩年合約。其實，老費搵基羅斯好大程度因為搵咗阿根廷中堅軒斯，有基羅斯做繙譯就唔使雞同鴨講，總算互惠互利。