股市大升千多點後，回落三幾百點，係好正常嘅調整。就好似港股今次升市，由低位反彈成1300點，市場都預咗會調整，但好似噚日跌得個勢咁急，大半日內，急挫成300點，又真係幾出人意料之外。
恒指最低11844，跌357點，尾市略反彈，但大勢都係弱，收11929，跌271點，成交大增到147億元。期指更一度跌逾500點，收11859，跌376點，又變番大低水70點。
噚日大跌市，期指係罪魁禍首。中午過後，有一個大盤（傳係幾百張）照市場價沽出，一插之下，由12100直落到11726（呢個位成咗一張）先搞掂，分零鐘之內，大跌374點；之後，成個市就散晒。
國企噚日已低開，幾隻大價股，包括中石油（857）、中石化（386）同中鋁（2600）都跌幾個位。有消息指鋁價大幅回落，中鋁開市冇耐，已唔見咗4%，午後受大勢拖累，低收4.075元，跌成8%；中石油同中石化受油價波動影響，分別下挫3.3%同5%。國指低收4097，大跌197點，跌幅4.6%。
港股噚日個跌勢雖然難睇，但暫時仍可視為升後調整。恒指一度跌穿10日線（11880），險守在250日線（11805），同埋上月27日的突破性上升裂口（11701至11839）之上，呢兩個係好重要嘅支持位，若然跌穿，就要重新估計。若睇期指，上升裂口（11690至11802）已補回大部份。
引發大跌市嘅原因，除期指大沽盤外，傳中央會再加大宏調嘅力度，以及亞洲油市重上40美元，同兩岸局勢又轉趨緊張等，都令人心轉虛。事實上，油價再升，打擊經濟，影響好深遠；家下支配油價嘅因素，政治風險已凌駕在供求關係之上，後者雖然可以由增產來紓緩，但前者嘅風險，在可見將來都冇機會消除。暫時，40美元係一個關口位，油價在40美元之上，升得愈高，對股市嘅壓力就愈大。
睇番國企，噚日跌勢雖急，但股價跌到低位時，又見到有大盤接貨，好似重鋼（1053）、燕化（325）、鎮化（1128）同人保（2328）等，都見到大行買盤前仆後繼。噚日成交大增，係有對手好淡爭持得好激烈。
郭兆誠