吳宇森拍嘅《喋血雙雄》、《喋血街頭》同埋《英雄本色》一系列嘅電影，早已經深入民心，最近洲立影視公司就特登為吳宇森推出一系列英雄片嘅數碼修復DVD。
噚日吳宇森喺洲立公司接受長途電話訪問，佢講番當年拍《喋血》系列係當時嘅新嘗試。對於《喋血雙雄》喺五月俾《Empire》雜誌選為十五部當下最具影響力電影之一，亦係唯一入選亞洲片，吳宇森話聽到消息好興奮，重知道德、法同比利時有教授將部戲做教材，吳宇森亦話覺得好安慰。
雖然吳宇森暫時唔會返嚟香港拍戲，不過𠵱家佢就搞緊部中國戰國時期歷史寫實片，重係同周潤發再合作㖭！但係觀眾起碼要等兩、三年先有得睇，因為搞劇本都要時間。吳宇森又講到梁朝偉攞唔到康城影帝，佢話一向好欣賞偉仔，亦知歐美影評人都好鍾意偉仔，演技已經受肯定。
另外，吳導演嚟緊會義務幫聯合國兒童基金會拍一段十幾分鐘嘅短片，用內地小朋友做古仔，係一個好感人故事。
林建明致力為心晴行動做嘢，早前就做咗個大型電視騷，成功引起各界對情緒病嘅關注，噚日林建明接受新城羅霖節目訪問，重乘勢做埋宣傳，佢話：「六月十六號就有個慈善首映，係成龍套《80日環遊世界》，有成四百幾張飛，分別一千同五百蚊，到時重會請好多名人同善心人出席㖭。」認真落力。
施念慈（Celia）早排幫減肥堂拍咗輯瘦身廣告，本來講好咗着背心短褲，施念慈去到現場先知套衫咁性感，但件衫着上身效果唔錯，所以唔介意。Celia話自己未減肥之前，成日俾老公嗌佢做肥婆，的起心肝減肥之後，老公又叫佢食番多啲，又話佢咁瘦咁靚嚟做乜，連馮仁昭都覺得呢個男人成日彈三彈四，好難服侍！
譚小環噚日出席《娛樂大搜查》嘅兩周年慶祝活動，佢話自己都即將會加入節目擔任主持，提到新一屆港姐嘅身材劣評如潮時，譚小環就好抵死咁話：「我以前都俾人叫過我肥環啦，希望佢哋好似我咁化悲憤為力量，我都係自己戒口減肥㗎！」馮仁昭都覺得啲港姐要爭氣，唔係點代表香港呢？
陳小春噚日喺橫頭磡出席「歲月優悠九重奏音樂會」記者會。有傳梅艷芳演唱會隻VCD，冇咗小春做嘉賓嗰段，係因為公司傾版權時獅子開大口，小春回應話當日有咁多巨星做嘉賓，自己憑乜抬高身價。另外，對於周永恆承認藏毒，小春覺得佢做得啱，希望外間唔好畀咁多壓力佢，因為勇於認錯，可以面對到就係叻，否則就係蠢仔喎。
任達華同名媛明美蓮噚日喺銅鑼灣出席一間酒樓嘅剪綵活動，任達華話佢近來成日接到啲冇來電顯示嘅推銷電話，覺得對方浪費佢嘅電話費，亦對佢造成騷擾，所以佢希望嗰啲公司可以改變佢哋推銷手法。明美蓮就話暫時都未有造人計劃，𠵱家重好享受二人世界。
