大市噚日失驚無神散咗，話就話係受油價困擾，但經紀陳就心生不忿，堅持係班期指客玩嘢。小初覺得根本唔使嬲，如果係有心水嘅話，不妨趁股價低殘儲多啲貨。
好似TCL國際（1070）咁，經過連串大動作後，未來究竟如何，大家眾說紛紜。雖然有外資行睇淡後市，但同時又有美資行力撐，認為TCL可吼。
TCL舊年與法國Thomson合併電視業務，後者虧損大就係人都知，但根據外資行引述公司管理層嘅話，情況唔係想像中咁差，好多虧損同成本將由法國佬負責，Thomson電視業務盤數，將於今年下半喺TCL帳目中反映，估計虧損唔會好似去年咁勁。雖然TCL盈利將受影響，但有人睇淡之餘，亦有外資行睇好。
TCL噚日跟隨大市跌6.5%，收2.525元，成交股數575.6萬股，金額1490萬元。
另外，熱鬧咗一排嘅哈爾濱啤酒（249）收購戰，在南非大股東表示唔玩後，應該塵埃落定。前日憧憬有反收購，摸頂在6元買入的投資者，相信最唔開心。
慕容小初