正上緊位嘅水着女星井上和香，呢排既拍廣告又做節目主持，甚至同MEGUMI一齊喺電視節目度鬥搶鏡㖭。不過，早排有傳井上曾經喺六本木一間酒吧度做過陪酒女郎，不過一直都得個講字。今期日本《NaitaiSports》就終於俾佢哋搵到確實證據出嚟。
據《NaitaiSports》報道，喺上月十五號，就有人將印咗井上喺N字頭酒吧做陪酒女郎嘅宣傳單張，放喺日本嘅Yahoo拍賣場度炒賣。當時嘅井上雖然重用緊阿里沙呢個假名喺酒吧工作，不過樣貌身材就同𠵱家冇乜分別，聽聞佢重好受酒吧一班熟客仔歡迎㖭。個拍賣底價由最初嘅港幣三百元起，七日後竟然炒到二萬多港元成交，真係嚇死人。
不過我大口羅拉見井上其實都係有心從良嘅，最近佢為一間財務公司拍廣告，着住套制服，戴住headphone，成個電話服務員咁款，響鏡頭前大sell可愛親切嘅笑容，睇落都幾有新鮮感㗎。
此外，噚日出版嘅《周刊文春》，就爆咗佢最近俾人目擊喺涉谷同摔角手須藤元氣拍拖，佢同小池榮子又幾似喎，一樣有意從良兼搵個大隻摔角手做男友。
唔知係咪水着女星俾人睇得多，都想搵番個好肉地嘅摔角手做男朋友，睇番夠本。