飯局之中，碰到T教授，教授呢排唔使上課，走上內地行個圈，了解實際情況，佢話汕頭方面，每周停電一天，珠三角工業生產基地，輪流停電，做廠嘅，叫苦連天，炎熱夏季已至，冷氣需求大增，電廠不勝負荷，睇落中國全國缺電，發電量追唔上經濟發展需要，缺電勢必影響經濟增長，最杰嘅就係油價升，煤炭價升，電價唔准升，發電廠點搞？加州大停電就因為以上理由，希望加州事件唔會在中國發生喇。
飯局上啲老友有好多關於內地嘅幽默笑話，只摘錄其中一個，話說某外籍酒店管理人員，被調往內地某大城市，管理大酒店。呢位經理到任不久，就日日巡酒店內餐飲場所，旺場時間（午、晚飯）更成個人企喺最旺嗰間餐廳。點解咁辛苦呢？原來佢發覺餐飲收入大都係信用卡簽帳收入，現金收入少到不成比例。佢唔信內地人客唔慣用現金找數，於是走去餐廳企咗幾日，監察收銀情況，一企之下，現金收益大增，先知道餐飲部上下集體作弊，夠膽將啲現金袋入袋。
資深編輯話：「外國唐人街華人餐館，收銀嗰位唔係老闆自己，就係老婆或者仔女或者二奶，你明白未？」T教授大笑：「唔怪得好多人在內地包二奶三奶，原來有此好處！」睇高陽小說《胡雪巖》，胡老闆到處留情，喺江南一帶主要生意據點都娶一個妾侍。胡雪巖嘅生意手法，係中國傳統，今人設廠開店，包二奶三奶，恢復古風而已。