昨日亞洲區股市下滑，不過香港好似跌得特別急，中午接近收市前，期指市場突然有800張市價沽盤（即不問價，見買盤承接便質），搞到即月期指一度大跌500點咁誇張，低見11726，好彩空軍未有大舉跟進，而有關沽盤亦好快被市場消化，股民才驚魂稍定。期指由低位反彈，跌幅收窄至376點，收報11859。港股跌271點，收報11929，成交147.59億元。
事後有人話，有關期指沽盤可能涉及錯誤交易。但阿虎就不敢苟同，因為現時市況的確充滿利淡因素，資金隨時會撤出，淡友早前已趁大市反彈，在12200部署空倉，噚日僅800張期指沽盤便令大市急跌，可見市場承接力相當薄弱，淡友又點會睇唔出。
國內官員吹風話，即使通脹升至5%警戒線水平，都未必需要加息，又話宏調措施已見成效，經濟可軟着陸云云。但國企指數噚日大挫4.6%。有傳聞話基金為認購蒙牛（2319）而減持其他國企股，蒙牛抽水13.7億元，中海集運抽水更達101億元，加埋成114.7億元，點都會對國企股構成壓力。
哈啤（249）晨早停牌，SABMiller終於鳴金收兵，兼且會出售哈啤股權畀安海斯，骨水鬆人。安海斯則以超高價購入哈啤控制權，表面上威風八面，但內裏有冇肉痛嫌貴，阿虎就唔多清楚。哈啤復牌後，相信要回至略低於5.58元收購價。按前收市價5.95元計，跌幅應超過6%。
花旗又唱淡中銀香港（2388），叫客減持，重話大股東6月中以後可能再減持。睇嚟空穴來風必有因，中銀香港跌3.7%至13.15元。
阿虎