林心如入行以來先後與蘇有朋及唐季禮傳緋聞,她早前接受訪問時表示,很珍惜與兩人的朋友關係,不會因怕傳緋聞而避忌約會。
林心如近年轉戰內地,下個月將拍攝古裝劇《繡娘》,她早前趁假期與友人來港玩樂。林心如直言在圈中很難交朋友,她說:「入行以來,演員之間喺拍戲時就成日見,拍完之後大家嘅假期、工作都唔一樣,好難交到好朋友,所以我好珍惜朋友,我全部朋友都係我國中嘅同學,我哋會日日通電話。」
林心如早前被拍到與緋聞男友唐季禮食飯及shopping,她照例否認對方是男友,她說:「大家食吓飯,冇乜大不了,我喺台灣都會約蘇有朋食飯,我唔會為咗避忌而唔一齊食飯囉!佢(唐季禮)係監製,係我工作上嘅拍檔。」
林心如表示因工作減少了與家人見面的機會,她一年之中有八個月在內地拍劇,只能爭取放假時間與家人見面,如早前就與母親及家人遊日本慶祝母親節。
提到工作,林心如細數過去曾演過的角色說:「演《還珠格格》時我重好細個,好似玩咁,唔覺辛苦。《小寶與康熙》嘅角色係我入行以嚟最鍾意嘅,雖然要聽廣東話,但拍得好開心,表現都幾自然。而拍《半生緣》時有四個多月都喺上海,最辛苦,好多內心戲,對我係一個磨練。」
問林心如最希望扮演甚麼類型的角色?她說:「我希望扮啞巴,因為只能靠眼神、肢體動作去表達感受、感情,好有挑戰性。」
採訪:林妙萍
攝影:林德雄
化妝:RickChin
髮型:KelvinKooofHair
服裝:Sportmax
場地:TheRitzCarlton