大狀湯家驊人氣強勁，九月立法會選舉出戰新界東相信已成定局，最新一期《信報月刊》訪問湯家驊，佢披露咗一件政壇秘史。原來九二年當時港督衞奕信想搵一名華人做律政專員，以便過渡九七做律政司司長，衞督曾託人邀請湯大狀加入政府做首任律政專員，而且講明做夠三年就可接棒做律政司，不過湯大狀思前想後，覺得做律政專員要涉及政治，就婉拒咗督爺邀請，最後政府搵咗現時親北京紅人馮華健做律政專員。湯家驊當年縮沙，對於香港人，可能好大影響。
除咗係律政專員人選，殖民地政府又問過湯大狀做唔做法官，湯大狀又拒絕咗，因為按慣例大律師轉做法官後就唔可以返轉頭重操故業，當時佢擔心中國收回香港後社會環境有變而要劈炮，而佢去到其他地方都唔可以做番大狀，諗到呢個問題，佢又婉拒咗做法官嘅邀請。湯大狀真係一個老實人。
（圖）湯家驊推咗做律政專員又推埋做法官。
傳真︰2623-9278
電郵︰