數碼影音：
靚相不求人Easyshare即影即印

全世界都鬥出高解像DC爭市場，柯達反而歎慢板，新機來來去去都係三、四百萬像素，不過一向力谷嘅撒手鐧EasyShare系統，放落底座度一㩒就可抄相兼充電，的確冧到唔少嫌麻煩嘅用家，而且配埋新推出嘅迷你打印機，靚相即影即有，質素重拍住傳統3R相㖭。
記者、攝影：徐影龍
ImageGirl：Natalie

柯達對入門級市場又真係幾專一，EasyShare不斷改良，就係為咗簡化一堆煩複抄相程序，等大家用得更為得心應手。同期一口氣推出新款500萬像素DC及熱昇華式打印機，雖然部DC規格跟舊型號變化不大，不過配埋部新出嘅打印機，影完靚相即刻就可Print埋出嚟，而且由印相到更改設定，都完全唔經電腦，方便簡單到痹，絕對符合EasyShare嘅精神。

500萬像素藍精靈
幫柯達打頭陣嘅DC，就係呢部LS753，單睇外形根本同舊型號LS743一模一樣，不過機殼就換成冰藍色，襯落部全金屬嘅LS753度，賣相登時唔一樣，的確幾吸引。除此以外，機內CCD亦由400萬提升至500萬像素，足夠列印一張A4尺寸嘅靚靚大相，唔怕狂爆「狗牙」咁肉酸。
除夜景、運動、特寫等13個場景模式外，值得一讚係動畫拍攝功能，達到640×480解像度，而且以MPEG-4格式儲存，慳記憶體得嚟又有高質素，細機嚟講算少有。除設有SD槽外，機內亦已內置32MB記憶體，當爆卡或失魂冇帶卡，亦可應燃眉之急。

熱昇華媲美曬相
同期推出為EasyShare護航重有呢部PrinterDock，採用熱昇華打印技術，好處係印出嚟嘅靚相絕對可媲美傳統沖曬技術，尤其係列印3R相片，由相片精細度到色彩表現，都拋離噴墨打印、雷射打印幾條街，不過缺點係打印用嘅色帶及相紙較貴，真係要揀清揀楚先好㩒個「Print」掣。
PrinterDock列印尺寸為6"×4"，透過機上圓形嘅功能鍵，已可操縱埋機頂嘅DC，進行所有揀相、印相等工作，再㩒吓個掣就可印靚相。當然用家亦可以USB線接駁電腦，變成迷你靚相打印機，比一般座台Printer更為慳位。跟機重附送一嚿充電，不過搵勻成部Printer都唔見有窿放，原來係畀DC用，都幾無厘頭。

KodakHK
電話：800901514

高解像DC印靚相
要將靚相印出嚟，3R尺寸點都要300萬像素先夠滑，若果鍾意印8R甚至A4尺寸，500、600萬像素就一定走唔甩。今日就精選多幾部高解像DC畀大家，全部以輕巧便攜為大原則，方便隨興之所至周街影SnapShot。

售賣點
（a）華仁會（23980280）
（b）UltraPro（28817052）