今年六四，次文化堂堂主、前《掃把頭》笑話出版人彭志銘反璞歸真，將支聯會自從一九八九年之後十五年嘅六四燭光集會演詞，輯錄成書（圖），留為歷史紀錄。
全書只不過係事實陳述，冇一字一句添加，點知問過幾個發行商，個個耍手擰頭，冇人敢接嚟發行。又係嘅，咁嘅風頭火勢，邊個接親，容乜易過一排又有中央領導人出嚟大罵：「在香港，有人出了一本關於六四甚麼的書，一頁頁撕下來用來擦屁股就差不多。」邊個出版商敢孭鑊。
呢本演講集，一九九五及九六嗰兩年最特別，因為支聯會當時面對九七，確係有少少腳軟，演詞相對溫和，不過一到九七，就克服咗心理關，回復亢奮。
始終支聯會嗰班友都係人。睇番呢本書仔，好似大飛話頭：「張鑑泉去咗已經十一年嘞，真係人生幾何。」中方已經將六四加多一個說法，叫做「重要的歷史事件」，胡溫靜雞雞報定案，大家放長雙眼喇，到時千祈唔好俾老左再變臉番頭啄呀。
傳真︰2623-9278
電郵︰