香港攝影記者協會噚日舉行「前線．焦點2003」周年攝影比賽頒獎禮，《蘋果日報》三位同事就勇奪咗三個獎項，包括由鄭逸宇以一幅男子抱女喺台北車站附近天橋欲跳橋嘅作品，奪得「突發新聞組」冠軍。黃賢創以一幅鯨魚在港水域擱淺嘅相片，奪得「自然與環境組」冠軍。梁祖彝則以一幅一家大細與一頭美洲豹公仔同枱食飯嘅相，奪得「特寫新聞組」季軍，真係可喜可賀。
比賽共有八十位攝影記者參賽，作品超過一千張，大會分七組各評審出冠、亞、季軍，合共二十一個獎項。
中文大學醫學院院長鍾尚志主持頒獎禮時，讚揚傳媒喺舊年沙士期間，將監察政府嘅功能發揮到淋漓盡致，又話舊年社會嘅風風雨雨令佢覺得言論自由同有一個開放嘅政府相當重要。佢更加勉勵傳媒同業，話𠵱家三位名嘴封咪，更加要發揮監察政府嘅作用，用閃光燈閃亮社會黑暗嘅一面。
（圖）《蘋果日報》攝影記者（右至左）鄭逸宇、黃賢創及梁祖彝，共勇奪「前線．焦點2003」周年攝影比賽三個獎項。
黃建通攝
傳真︰2623-9278
電郵︰