中原股東王文彥，以怡居及長安地產常務董事身份，月初喺中原網頁專欄「指點江山」，指代理行吹水風氣不可長，以太古城為例，單係兩大代理行講嘅佔有率，夾埋竟然超過一百巴仙。又話中原聲稱，○三年底分行二百間，但至今實際只得一七七間。
中原執董張奕威第二日喺另一個欄話，文章係衝佢而來，
而且要維護中記品牌，不得不回應。佢話，王文彥先至係吹水專家，請王攞出數據，同中原資料印證吓。
張奕威又話，中原喺地監局登記嘅分行，係一七七間，但總數未計唔使向地監局登記嘅十九間工商舖分行，再計埋新開嘅分行，總數其實已經有二百。
佢重查到，地監局只得怡居登記，但冇長安牌照登記紀錄。
最近勁開分行嘅京士活，好多時都見到娛樂圈經理人Ba叔主持開幕剪綵禮，每次佢都儼如主人家，幫手打點，有時更帶埋姐仔哥仔撐場，真係使人懷疑，佢究竟係唔係京士活幕後老細。
無論如何，有Ba叔咁支持，京士活應該做到唔少藝人生意。
最近，真係多咗人加入代理行業，代理分行愈開愈多，除咗兩間大代理集團，喺各區不斷插旗，成立冇耐嘅京士活，可謂最勇猛，上個月至今，開咗七間分行。
京士活董事鄧智勇話，希望今年開到三十間，總投資五千幾萬。
另外，北角地膽代理亞洲地產，都諗住今年增加分行到七間。
日進首間地舖，噚日開張，因屬旗艦店，特別大陣仗，有埋舞獅，打鑼打鼓。唔單止樓上街坊探頭張望，有兩位經過嘅外籍遊客，乘機影番幾張相留念。
過時過節，好多時舞龍舞獅，平時就難得一見，估唔到日進今次順手推介香港特色，為宣傳旅遊盡一分力。
日進噚日正式加入物業代理行列，董事總經理吳有根話，今年目標開五間分行，定位代理行與測量師行中間，提供專業服務，爭取有要求嘅客。
蘭西
電郵地址：