恒指最低時散357點，埋單唔見271點。即月期指重悽慘，最低大瀉509點，埋單唔見376點，收報11859，低水70點，情況似乎唔多妥。但市場往往唔係低水一定代表個市會繼續跌，高水唔一定代表個市會升。
亞太區昨日跌市，火種係油價。隔晚紐約期油其實已由前市高位回落5.6%，形勢本來唔差，但亞洲市油價回升，搞到人心再弱。昨晚紐約油價若然再跌，港股升番二三百點唔係冇機會。
博大市反彈，吼恒指Call輪，可以揀9099、9773同9799。9099今個月尾到期，輪價16.1仙，溢價2.9%，槓桿率43.7倍，呢件嘅爆炸力同殺傷力非常大（昨跌40%），注碼要克制，而由於快趣期滿，溢價會收縮得好快，買賣要快手快腳。9773喺9月尾到期，輪價10.9仙，溢價5.6%，槓桿率19.9倍，呢件日子較長，溢價冇縮得咁快。9799亦係9月尾夠鐘，輪價10.7仙，溢價4.5%，槓桿率18倍。
滙控（005）繼續浮上浮落，反反覆覆，可炒波幅，低位撈Call輪，高位賺錢走人。
滙控Call輪槓桿率普遍好勁，所以對正股變化一兩蚊都有好大反應。9783喺9月到期，輪價75仙，溢價1.9%，槓桿率14倍。搏殺格，則揀9173，下月中夠鐘，輪價14仙，溢價4.7%，槓桿率83倍，壽命短，溢價唔低，比較適合炒出炒入，切忌坐盤坐得太耐。
章盛