地鐵公司噚日舉行一年一度股東大會，第一次由主席錢果豐主持。新人事新作風，會場入口處新設股東客戶服務及股東諮詢處，畀股東表達意見。但會場內依然有股東發問，好似有位梁先生，話近排廖秀冬對地鐵建議嘅南港島線採取壓抑姿態，因此佢要嚴重抗議，因為南區上午十一點至一點好難搭車，起地鐵可以有多一個選擇。佢認為廖局長做法好唔稱職，應該調去做社會福利。
另一位住荃灣大窩口嘅梁先生話，大窩口站落成以來出口都冇扶手電梯，有次佢痛風發作，地鐵職員用一部電動椅幫佢上地面，但係就一路上一路「櫈」，「櫈」到佢好辛苦。佢話與其用幾十萬買部電動椅，不如起條電梯重好。佢又話由出口行去巴士站冇上蓋，落雨好唔方便。錢果豐冇即刻應承，只係話如果成本許可，會盡量滿足顧客要求。睇嚟顧客做咗股東，都未必可以有求必應。
傳真︰2623-9278
電郵︰