今日係六四屠殺事件十五周年，當日民運領袖王丹同吾爾開希，經已率先喺美國開波，對正中國駐美大使館絕食紀念抗議，在全球華人社會，新加坡唔係中國，冇嘢搞唔出奇，至於台灣，因為經已差不多完成「去中國化」，所以六四對於台灣政府只不過係一個無邦交嘅外國所發生嘅好不幸嘅政治事件，若果台灣要紀念六四，咁亦要紀念埋盧旺達種族滅絕大屠殺，何況阿扁俾中國炮轟得好勁，無謂插手人哋內政，避免捉蟲，亦好正常。
數來數去就剩番香港繼續搞六四燭光會。今年十五周年，逢五逢十，梗要搞大佢。為促進超級市場及百貨店嘅蠟燭火柴消費，振興零售業經濟，或者向自由行嘅大陸團凸顯香港作為一個自由港嘅特色，全港市民今晚都應該出席燭光會。
唔止係有血性有正義感嘅中國人今晚維園見，連土共左仔，亦無任歡迎。正如葉劉去年話齋，參加七一大遊行嘅未必係個個為咗反二十三條，好多係想家庭同樂散吓步。六四平暴事件，有啲解放軍戰士遭到「暴徒」打死，條屍吊喺天橋，死鬼廖瑤珠生前出席人大會議，亦試過突然開開吓會企起身肅立致哀，中方大驚問佢搞邊科，佢話為六四死難者特別係「英勇犧牲」嘅解放軍默哀，祖國當堂俾佢吹脹。
不過，到場為解放軍默哀嘅另類小撮人士，為人身安全，到咗場攞支蠟燭就好耷低個頭，無謂阿支阿佐，若果唔係，維園阿伯呢一班鬼魅，今晚通通絕迹，冇人救到你。
另外，今年六四，冇咗毓民上台吹雞。毓民又遭到中方高官唐家璇以粗言穢語，用到「屁×」兩個字，聽講電視新聞播出之後，好多家長向電視台投訴半點名辱罵，今晚毓民喺肉體方面唔喺度，不過佢老人家嘅精神一定徘徊喺維園。重有紀念大班封咪將屆一百日，同埋大飛午夜凶鈴事件即將滿月，今晚都好應該去維園坐吓，唞吓涼。
最重要嘅就係難得一年有今日，十幾年前嘅舊友都可以見番。大家嘅信念依然一樣，重係選擇咗做一個昂首挺胸嘅人，冇人變咗奴才。話唔定重會撞番十五年前分手嘅舊情人，今日重逢，相對無言，一個經已唔再化妝，眼角起魚尾紋，另一個就頭頂半禿，有埋一個肚腩，大家四目交投，雙方各自拖兒帶女，以前嘅私情，無謂再提，但十五年來，呢一點點家國嘅恩仇，原來一直都冇變。
一點燭光，萬般情愁，今晚維園見……
傳真︰2623-9278
電郵︰