四年一度嘅歐洲國家盃就快開始喇！呢個咁大型嘅球壇盛事，水着界當然要瞓身支持啦。自稱係個超級足球fans嘅水着女星磯山沙也加，當然唔放過呢個機會趁下熱鬧，影番輯靚相啦！
穿上另類波衫嘅磯山，成個足球小將咁款，一時小志強上身扮猛虎射球，一時扮晒受傷，表情多多。轉個頭又穿上和服扮戴志偉嚟招倒掛金鈎㖭。不過着住厚底木屐嚟踢波，會唔會唔係咁方便呢？
踢波又點可以冇咗啦啦隊幫手打氣㗎？磯山呢個啦啦隊造型就認真夠特別，比堅尼上身加埋條和服小短裙，無論邊個見到打扮得咁性感嘅磯山，踢波都會踢得零舍醒神啦！不過我大口羅拉就奉勸守龍門嗰位仁兄要小心啲，千祈咪掛住昅嘢，因住一陣俾人射入波就弊傢伙！
磯山重話要做埋球證㖭，着住件超低胸和服同化濃妝嘅佢，一邊手執紅牌，然後再加個鬼死咁認真嘅眼神，唔知佢想趕邊個出場呢？不過講真，如果係俾個咁性感可愛嘅球證趕出場嘅話，相信大家都冇所謂啦！