五月二十五日，本欄講鄭大班嘅感慨，即係話有啲工會領袖表示反對被派往中國內地工作。一位讀者Ting來電郵，提出一啲精闢見解，值得與讀者分享。讀者T話三個月前，佢喺內地已經開始聽唔到鄭大班嘅網上廣播，商業電台網與now.com都無法子重播「風波裡的茶杯」。
關於回內地工作，讀者T提出一個新名詞，就係「唔好彩三十五歲」，到咗三十五歲，行政人員通常（一）職業穩步上升，（二）太太職業唔錯，（三）兒或女讀幼稚園或小學，（四）開始供樓冇耐，（五）中文冇咁掂，普通話唔多識講。偏偏公司機構認為呢批三十五歲行政人員已擁有足夠才能、精力、經驗，係派往大陸做主管嘅最佳人選。如果你係三十五歲，升上經理職位，就快有機會升做助理董事或董事或總監，有齊上述五點特徵，你肯唔肯去內地先？怕且非常痛苦，但係唔去唔得。呢啲機會好快就冇，因為讀者T認為五至十年之內，內地人就會有資格（經驗加歷練）擔當重任，香港人想到內地都冇機會。
其實大公司派人入內地，費用好貴，長期唔多着數，故此逐漸以中國徵聘條件（所謂localterms）聘請新畢業生上大陸，當係儲備人才之用。一句話講晒，香港人如果唔及早爭取內地工作經驗，以後就唔夠競爭力。但係要上去咯喎，家庭問題多多。美國一啲DINK族（DoubleIncomeNoKid）經常出現老公在紐約、老婆在洛杉磯各自返工嘅情況，香港遲早一樣。