油價升破42美元，但港股只略為回軟就反彈，升96點，收報12201。期指更勁升151點，高水34點。不過，大市有啲陰陽怪氣，噚日沽空略為增加至6億元，新地（016）沽空金額1.25億元。傳有基金正減持地產股。
安海斯正式提出以每股5.58元全購哈啤（249）。哈啤復牌勁升，全日升16.7%，收報5.95元，較安海斯全購價為高，市場似乎預期SABMiller會提高收購價。早前SABMiller行政總裁曾表示，每股4.30元的全購價已經「到價及合理」。呢句說話被哈啤財政顧問捉住嚟玩，揶揄SABMiller若再提價，點向本身股東交代？
其實SABMiller早已澄清有關言論，不代表不會再提高收購價，意味SABMiller已對提價有心理準備。
噚日見到唔少大行入市高價掃貨，可能是春江鴨正在收集。有人話今次奪啤雙雄已經演變成意氣之爭，其實有乜所謂，總之股民得益就得啦。
老虎科技（8046）4月中公布首三季業績盈轉虧蝕450萬元後，股價表現一直唔理想，由0.40元跌至0.17元水平，噚日更單日重挫77.7%，收報3.8仙，成交257萬元，有些少似斬倉格局。但黑客話係有人沽貨止蝕。呢隻股份平時成交稀疏，如果係斬倉，可能唔止跌8成。
吉利汽車（175）宣布，旗下合營公司斥資逾7億元，購入國內汽車資產。噚日股價由0.70元升上0.81元收市，成交大增至5771萬元。Cookie話，聽講吉利汽車正部署集資，不過嫌現時股價太低，配股唔化算，估計重會踢高啲。
阿虎