立法會調查沙士專責委員會開咗無數咁多次研訊，連老董都見埋，報告初稿已完成，希望月底出到最後報告，就大功告成，雖然楊永強分分鐘被委員會點名要佢問責，但八方聽聞，佢老哥仍然好多謝以羅致光為首嘅委員會畀機會佢解畫。
有人問楊醫生，佢最近又遭到某啲傳媒密集炮轟，係咪有心理準備過此大關？豈料佢淡淡一笑話，喺佢心中大關舊年已經安全度過，就係沙士疫情受到控制，其他都唔重要，當然佢認為報告內包括埋其他專家嘅睇法更公平。
楊永強喺沙士事件中試過失言，有冇失職要睇報告點寫，舊年當中台星負責醫療衞生嘅官員都紛紛下台之際，佢老哥依然故我，信服老董嗰句：佢留低比離開更加負責，亦要更大勇氣，八方估佢一定唔會中途離陣咁羞家。事實證明特區政府今次處理禽流感比從前進步好多。
楊醫生話都有想過寫沙士回憶錄，雖然佢做到高官，不過佢話自己文字唔好，要搵代筆，又話呢個係三年後佢退休之後嘅事，現在事忙，暫且不理。
傳真︰2623-9278
電郵︰