立法會噚日辯論名嘴封咪事件，八方以為大飛會有興趣聽吓，點知佢一早答應咗母校培英中學出席畢業典禮。
飛哥話，轉眼離開中學已四十五年，母校亦搬咗去華富邨咁遠，不過，做人要飲水思源，所以學校叫親佢幫手，佢都冇托手踭。
共幹成綬三自己跑出前台，加上范太親證「民間人士」嘅成某確實係收緊料，《信報》曹仁超亦證實佢話有線上通中央，足以證明飛哥冇講大話，亦證明飛哥唔做《風波》係正確嘅，「一唔做節目就冇晒人搵我，佢哋都係想影響我做節目，叫我要『持平』啲。」飛哥梗係唔使人教佢點做，佢寧願割愛叫停。
飛哥以為今次做好準備，問過先開咪，但始終唔掂，最後只好連人大都唔做，「變成一介平民，議事論事都唔知幾輕鬆。」飛哥認為今次事件令中央同特區肯公開重申保護言論自由已不錯，其他說話都冇大用。《信報》曹仁超則斬腳趾避沙蟲，閂晒手電，一於唔覆call。
傳真︰2623-9278
電郵︰