旅遊景點大坑虎豹別墅，轉眼會變住宅。長實高級營業經理黃思聰話，為凸顯個盤身價及地段，會採用頂級材料去包裝。靚成點就遲啲向傳媒介紹。
長實預算，淨建築費都要二十億，集團派兩隊人，一隊飛倫敦與紐約，觀摩外國建築水準，好似豪宅與新式酒店，另一隊飛去南美、非洲及奧地利採購物料，夠晒認真。預計淨係建築成本，每呎三千蚊，貴過晒現時分層豪宅建築費咁話。
長實系內建築費較貴嘅，近年有九龍塘畢架山一號，要千五蚊呎，紅磡海名軒就千三四。虎豹別墅重建項目講到咁豪華，但買家心急都冇用，因為最快第三季至賣，今年內唔會推多過一百伙，千四至千八呎標準單位，意向呎價萬三，複式要兩萬。
快將入伙嘅土瓜灣傲雲峰，現樓吸引唔少上車客換樓客垂青，好似梅艷芳前度男友林國斌，日前用三百萬，購買傲雲峰第三座高層C單位，七一七呎，每呎四一八四元，唔知係咪睇中個盤就快入伙？聽講，佢諗住用來自住，唔使幾耐就可以搬屋。
話時話，呢個樓盤附近九龍城沙浦道地皮，今個月中就拍賣，唔通林生睇好賣地價，洞悉先機，預先入市。傲雲峰嘅地點都算市區，或者到時賣地成績有推動樓價作用。
蘭西日中收唔少地產代理或物業顧問行嘅郵件，主要係物業報告。最近收到一件，只得六頁紙，但幾有心思。
領域測量行嘅報告，粉紙印刷，相片全部彩色，睇落醒神。好似介紹住宅咁，有大廈外觀、客廳、飯廳、泳池與景觀。寫字樓就有外貌、會議室及入口大堂接待處等。睇吓都開心啲，唔係好似以前咁，齋外貌死板板。
𠵱家乜嘢都講求增值，做報告畀客睇都一樣，第日代理行與測量行又要鬥多瓣。
物業管理行業競爭激烈，惟有不斷增值，攞到有代表性嘅證書，就係實力最佳證明。新地屬下康業服務，啱啱攞到香港優質標誌局頒發「香港Q嘜優質服務計劃」證書，有關物業包括北角豪廷峯、淺水灣127號、葵涌華景山莊及荃灣達貿中心。
康業董事總經理鄺正煒話，集團○一年推行內部品質認證計劃，安排神秘顧客突擊檢查，管理層又不時去做家訪，收集客戶意見。另外，每年搵獨立機構，用問卷調查業戶對管理滿意程度，結果年年上升，舊年係歷史高位，九十七點八個巴仙。
另外，上市公司新昌管理，同樣攞到呢個獎。佢哋又攞埋壹週刊2004年物業管理組別服務第壹大獎。
近排物業標售，可以即日成交例子唔多，暫時知道有深水埗潤發大廈地下A舖及一樓E室銀主貨，噚日下晝截標，收到四份標書，大家出價好接近。卓先潘子明話，由資深投資者用二千萬奪得。
地舖三八四○呎，樓上五○六呎，另平台四二二呎，交吉。
講番招標物業，噚日都有啲截標，好似北角城市花園商場二十四至四十九及一○五號舖，代理美聯測量師行話收到兩份標書，但與業主心目中價錢差些少，業主要開會研究。
蘭西
電郵地址：
