有冇覺得效力皇家馬德里嘅巴西前鋒朗拿度唔同咗呢？大家咪誤會，佢冇走去整容，只不過係成功減咗六公斤啫。
西班牙《阿斯報》日前報道，巴西足總證實朗拿度經過近半個月嘅地獄式特訓後，終於瘦身成功，踢走咗六公斤肥肉。究竟朗拿度食啲乜，可以在短時間內極速瘦身，等我求大俠同大家講吓啦。
喺呢十幾日，朗拿度一日三餐都係食沙律、雞肉同埋通心粉，其他嘢一概唔准食，加埋照舊好似平日咁練習，結果就成功減磅。𠵱家嘅朗拿度同之前判若兩人，頸同腰都瘦咗，連人都靚仔咗㖭！
其實大家唔使羨慕朗拿度，只要逢星期一至五睇我哋蘋果體育嘅《Fit男Fit女》，包保你由豬扒變型男或者索女。
雲尼亞里喺前日俾車路士炒咗魷，估唔到最嬲唔係佢本人，反而係佢八十四歲嘅阿媽蓮娜達。蓮娜達話車仔高層透過電話炒佢個仔，連當面講都費事，直頭唔當佢個仔係人。我求大俠都覺得車仔咁做好唔大方，但諗起雲尼亞里可能執到一億港元分手費，受少少氣又算係啲乜嘢。
車路士嘅梅度喺倫敦生活得不知幾咁富貴，住大屋揸靚車，又成日媾女，但佢嗰位住喺羅馬尼亞嘅阿嫲就慘囉，每個月靠嗰七英鎊公援過活，咁都未算，成七十八歲人重要去街市賣生果幫補生計。聽講梅度紅咗之後，淨係寄過部彩電畀佢阿嫲。梅度咁鬼不孝，小心俾雷劈呀！
英國天空體育進行咗一項選舉，叫球迷選今屆表現最好球員，結果由阿仙奴嘅法國前鋒亨利贏咗。亨利今屆威到盡，除成為英格蘭足球同埋球員先生，兼且攞咗今屆歐洲金靴獎。亨利𠵱家嘅目標，梗係即將展開嘅歐國盃，希望佢可幫法國衞冕之餘，自己攞埋最佳球員同神射手啦！
巴勒莫落實升上意甲後，個有錢會長森柏連尼急不及待開水喉，已經總共用大約五百萬歐元簽入阿根廷新晉國腳干沙里斯同埋巴西甘美奧後衞A彭利拿加盟，意乙球季未完，後者已經跟操緊。據講呢個只係開始，森柏連尼今夏大約會用二千萬歐元組軍，呢個數連意甲班霸都未必出到。