港股調整1日，馬上再升過，恒指彈高96點，啱啱補番前日跌幅，市底真係幾強，OPEC今日開會講增產，油價一旦見頂回頭，股市隨時踏盡油門，快放1段。
恒指Call輪9773同9788，均有超過11%升幅，昨日早段有平貨買，低位入咗貨者，不妨揸耐些少，博恒指升離50日線。
地產股呢幾日調整，由滙控（005）支撐大局。地產股唞完氣後，隨時捲土重來，帶領大市破關，地產Call輪要趁低收集。
龍頭地產股新地（016）見近期高位68元後，調整咗4日，昨收65.25元，10日線已升破20日線，形成黃金交叉，調整隨時完結，昨日介紹嘅新地Call輪9391，繼續收集可也。
大隻地產股當中，長實（001）昨日最醒，收58元，升1格。長實Call輪正路揀9227，今年11月10日到期，大把日子，現價52仙，溢價9%，槓桿率11.2倍。
想搏殺啲，9817可以考慮短炒，9月尾屆滿，現價23.7仙，溢價14.4%，槓桿率24.5倍，爆炸力強。
是日輪王，係大成生化（809）嘅公司輪1143。正股只係升咗1毫子咁大把，升幅唔夠2%，但1143就由69仙飛上1.18元，大升71%。1143好長命，07年至到期，但溢價96%，槓桿率僅4.7倍，呢套數據，好難買得落手。
章盛