已經三年冇開演唱會嘅鄭秀文（Sammi），終於宣布下月二十二號至二十四號，同埋二十九號至三十一號，喺紅館舉行六場「SammiVsSammi鄭秀文演唱會」。
馮仁昭初時都唔明點解演唱會係Sammi對撼Sammi，原來呢個主題係Sammi自己諗出來嘅，佢話成日都有人猜測邊個係佢嘅接班人，不過佢強調假想敵只有一個，呢個就係佢自己。
為咗配合Sammi呢個諗法，演唱會嘅海報會有兩個Sammi出現，一個係男一個係女。無論男版定女版嘅Sammi，都係着住露背裝，男版Sammi重攬住女Sammi㖭，都幾過癮！不過馮仁昭覺得Sammi呢輯海報似曾相識，因為日本天后濱崎步早排嘅唱片宣傳相，都係玩兩個步姐互攬。
拍攝海報嗰日因為時間好趕，所以大家都好緊張，Sammi為咗紓緩呢個緊張氣氛，女扮男裝嘅佢即刻扮謝賢行路。回復女兒身時，又扮瑪麗蓮夢露，搞吓笑等大家冇咁緊張。
組合Sky噚日去商台接受訪問時，Yani成為眾矢之的，因為佢係咁將病菌傳染畀其他隊員，搞到個個輪流唔舒服。最離譜嘅係Yani將一份藥分畀四個人食，又有病都唔戴口罩，所以公司最後命令Sky以後邊個病都一定要戴番個口罩。馮仁昭覺得佢哋咁樣認真唔衞生！
自言如廁時被偷拍嘅陳淑蘭，噚日嘅心情已經平復番好多，不過佢話經過呢件事後，有一種好強烈嘅使命感，因為佢知道就算告到偷拍佢嘅人，都只係可以告佢遊蕩，所以覺得呢個懲罰唔夠嚴厲。而蘭子前日主持節目後，一個人走咗去食麵，蘭子醫完肚就即刻揸車返屋企，唔知佢係咪覺得條街危險，所以早啲返歸呢？
張國榮（哥哥）過咗身成年幾，但噚日竟然有內地網頁話有人喺阿根廷見到哥哥。報道重話梁朝偉透露王家衞為呢件事飛咗去阿根廷了解。不過王家衞所屬嘅澤東公司噚日回應話咁嘅新聞都傳得出嚟，真係冇得頂。因為王家衞根本就喺香港，偉仔就更加冇同內地傳媒講過呢啲嘢。呢單新聞喺內地傳到好似真咁，馮仁昭覺得真係誇張！
劉德華、章子怡同金城武主演嘅《十面埋伏》下個月會喺北京搞首映，到時大會會喺大銀幕度播出梅艷芳嘅唱歌片段，而華仔就會透過大銀幕同阿梅對唱，以償阿梅想拍呢部戲嘅心願。而部戲喺康城觀摩後，日前《世界經濟論壇》大讚呢部戲將動作電影推向高峯，重話部戲一出，張藝謀地位會更崇高㖭！
美國女歌手BritneySpears日前被指已得到內地舉行演唱會批文，下年初喺內地開騷。不過中國文化部方面噚日澄清，話Britney根本未攞批文，單消息只係純屬流言。而Britney早前取消咗原定九月喺北京嘅騷，演唱會搞手話要同Britney打官司索償。
香港電台下個星期五（十一號）會播出《許冠傑音樂之旅》，節目收錄咗許冠傑嘅珍貴表演片段。丘亞葵噚日去港台出席有關記者會時，透露李小龍遺孀今日會嚟香港，之後會去睇許冠傑演唱會，順便捧佢個女場。丘亞葵話許冠傑要求今次演唱會唔好推出任何DVD同唱片，佢覺得想聽佢唱歌嘅歌迷會去買飛睇佢嘅，呢招都幾絕喎！
