選舉期日漸臨近，民主派中人一早收晒風，北京已經收齊晒佢哋嘅「黑材料」，留番喺九月做佢哋世界，但係乜嘢材料，就冇乜人知喎！
最近八方從一班愛國愛港人士口中聽到，有中方官員實牙實齒咁話，每個民主黨議員已經同佢哋開晒「快勞」，有晒佢哋嘅「罪證」喎。
八方奇怪，若果真係有料到，照計以往都已經揚晒，冇理由家吓先擰出嚟？有愛國愛港人士引述班中方官員講，人就梗會貪吓小便宜，民主黨班議員你估冇咩！不過冇人寫啫，嗰官員重話，咁多人之中，以李華明個「快勞」最厚。
八方第一時間走去問肥仔明，你有冇收過着數先？佢立刻話自己乜都冇收，只係有時過年過節收吓生果籃、月餅，但係都係分晒畀職員，又或者因為議員身份，俾人請去睇吓戲、食吓飯，佢講吓講吓，先至記起國泰航空公司常務總裁陳南祿話要請佢入馬場同埋睇歌劇，佢老哥立刻推咗佢，怕且肥仔明由𠵱家到九月都要謝絕應酬，晚晚返屋企食飯先得啦！
至於，民主黨嘅選舉委員會就決定開會討論今次黑材料事件。
傳真︰2623-9278
電郵︰