飛天朱噚日同一班行家食飯，食食吓，竟然收到自稱「北京成綬三」嘅call！個message話「見到你喺某某日報報道，請致電我家，電話××××××」，飛天朱就即刻覆電話畀「成成」，兩人更傾咗五分鐘電話，重畀行家影相。
飛天朱問候「成成」個仔讀大學讀成點，「成成」就話佢重讀緊博士，佢又同「成成」講，件事已經水落石出，香港傳媒好易失憶，一個星期後就唔知邊個叫「成成」，不過你就千祈唔好問候我老婆啦！
成件事咁天衣無縫，搞到八方就好質疑，點解「成成」唔直接打電話畀飛天朱，反而隔一層落call機？係咪飛天朱嘅精心設局？
有意喺新界東選立法會嘅飛天朱重爆料話，自由黨田少成日喺新界東請人食飯！不過田少同八方澄清，無飛天朱請得咁多，佢自己喺新界東嘅民調比民主黨鄭小班低，但係同湯大狀、前綫卿姐差唔多。咁即係話，田少咁受歡迎，唔使靠請食飯啦！
所謂「螳螂捕蟬、黃雀在後」，原本放心去直選嘅田少，欽點咗黨友林健鋒代佢選功能組別，但估唔到殺出個程咬金，總商會副主席蔣麗莉又話想選，田少就力撐小林話，總商會理事大多數支持小林！
（圖）飛天朱布好局喺記者面前同成成通電，重問候人哋家人。
傳真︰2623-9278
電郵︰