大飛凶鈴事件之前，英文《中國日報》炮轟大飛，引起眾怒，事後中方縮沙，話《中國日報》文章係「外來投稿」，不過，香港人俾大飛吸引住，唔察覺到《中國日報》呢條大白鯊，除咗噬大飛，重噬咗投資推廣署署長米老鼠一鋪甘嘅㖭。
事後，雖然早已加入「中國籍」嘅「盧同胞」反擊，話自己外遊，唔係去歎世界，而係替香港搵緊投資路數，但英文《中國日報》噬盧維思，顯示本地親中派對「前朝餘孽」嘅怨毒，真係仇深似海。
《中國日報》嘅英文文章，靈感嘅來源，確實唔係胡溫嗰條線，而係特區嘅親中陣營。本來想玩大佢，趁機清枱，打擊「盧同胞」，志在佢嘅後台煲呔曾。阿董若然好似經濟學人咁預測，明年玩完，甚或今年立法會選舉之後提早「保外」，咁就一定由當奴攝位代理。當奴一旦食死個位，就會阻住好多人第三屆上，因此土共方面，一早想除當奴而後快，呢一樣早已唔係秘密。
於是先郁盧同胞，準備放火燒外圍，點知呢個時候突然殺出單「午夜凶鈴」，大飛變咗第一受害人，《中國日報》「為非作歹」，搞到胡溫冇晒面，米老鼠反為可以鬆一口氣。
何況迫阿董炒盧維思，以現時嘅形勢又邊有咁容易。盧維思就算幫你亂咁敗家，敗盡都係一億，衞生福利局局長楊永強，當初話沙士冇喺社區擴散，搞出咁多條人命，特區經濟半年吊鹽水，損失以百億計。楊永強唔使炒，點解盧維思就要劏？
事件更加複雜嘅就係，維港匯呢鑊嘢，最大嘅黑後台就係美商會詹康信。呢個老詹，係本港鬼佬名流中絕無僅有嘅撐董主力分子（另外嗰個就係高齡鬼婆傳教士杜葉錫恩，可惜杜老太經已九十幾，全無影響力）。鬼佬都挺董喎，你話國家同阿董幾有飛屎。郁盧維思，更加要諗埋詹康信嘅面子問題。
再加上現時特區政府呢個爛班子，「英語人才」買少見少，又想做「國際大都會」，出去假大空狂sell特區，搵個鬼佬出去車大炮，說服力點都強啲，所以盧維思根本定過抬油，中環精英界口痕友話：人哋呢個「盧詹賣港集團」，美英勢力勾結，頭腦都精明過你班特區土佬，一個就入定「中國籍」，一個就一早表態撐董「愛國」，補定晒飛，睇準中國佬嘅死穴，就算土共激到紮紮跳，借英文《中國日報》謾罵都嘥氣，呢啲就係政治智慧嘞，明冇？
傳真︰2623-9278
電郵︰