郭富城與古天樂在新片《柔道龍虎榜》中飾演柔道高手，連日來要應付不少動作場面，兩位主角互撻時因為不懂得卸力，結果不慎弄傷對方，而城城更表示弄傷肺膜。
古天樂、郭富城、應采兒及陳小春前晚在觀塘拍攝杜琪峯執導的新片《柔道龍虎榜》，城城埋位前不斷貼藥水膠布，手腳亦有不少瘀傷，原來近日他與古仔都要應付連場對打戲，雖然現場有柔道教練在旁指點，但兩人因不懂卸力，故此經常打傷對方，城城日前更傷了肺膜。
雖然弄得遍體鱗傷，但城城仍覺得好玩，他說：「早兩日有一場戲古仔要拉住我手臂，點知俾佢拉完之後，我隻左手手臂瘀咗一大塊，真係冇諗到佢係咁大力！其實都唔止我傷，古仔一樣周身傷，不過今次拍呢部戲我好開心，因為大家好專業同認真。」
古仔開工時一臉倦容，他說：「呢幾日都拍打戲，有時拍完通宵戲返到屋企成身散晒，我撻落床真係唔想郁，但開完工成身臭汗，唔沖涼就瞓自己都頂唔順，所以都要爬起身去沖涼，我都未試過拍部戲打得咁辛苦，不過我見導演拍得好用心，所以我覺得辛苦都係值得。」
對於一手提攜古仔的無綫藝員科經理蕭笑鳴即將離職，古仔昨日說：「我已經知道啦，我會尊重佢嘅決定，佢將來喺唔喺無綫，我哋嘅關係都唔會改變。至於無綫對我亦好好，但會唔會續約無綫，𠵱家講呢個問題早唔早啲？因為我同公司重有成半年合約先完，呢排我又忙拍戲，根本冇時間諗呢啲嘢。」
採訪：陳月媚
