向來炒味甚濃的吉利汽車（175），自從周初公布向阿媽收購兩項汽車資產後，股價走勢明顯比其他汽車股好。
經紀黃話，吉利搞作多時，似乎終於修成正果，獲得外資大行睇好推介，擺脫以往被視為莊家股的陰影。
吉利日前公布，以7.23億元向阿媽收購兩項汽車資產後，股價由0.70元水平上揚，噚日再升6.6%，收0.81元，成交股數有成7345萬股，金額5771萬元。
小初當日唔多鍾意吉利，因為新主入局之前，隻股炒味太重，而且又唔清楚吉利背景，加上舊年有某歐資大行幫佢配股後，股價由高位1.11元一直散落嚟，睇見都心驚。
經紀黃話，吉利今次收購阿媽資產，聽講外間反應唔錯。有外資行重覺得公司專注低檔汽車市場，前景同增長率更可看高一線。
另外，停牌話配股嘅展鴻控股（572），噚日仍然未復牌，唔知佢搞邊科？經紀陳話配股計劃冇變，只係有小小技術問題尚未搞掂。
慕容小初