日本人氣女星菜菜子，前日已經喺東京都內嘅醫院，為丈夫反町隆史平安產下第一胎，佢哋嘅第一件愛情結晶原來係個女，現時母女都好健康。早前日本狗仔隊喺菜菜子臨生之前偷拍到佢大住肚同老公去shopping嘅相，但佢睇落去好瘦。
反町隆史同佢老婆菜菜子，噚晚深夜透過所屬事務所傳真各傳媒，公布前日順利誕下第一個女嘅喜訊。佢哋喺聯名傳真度寫住：「雖然比預產期早咗，但係個BB好健康。生產第一胎，有啲不知所措，但係我哋真係好高興屋企增添多一名新成員，對今後嘅生活亦十分期待。」
二人喺傳真度冇提到BB嘅體重，刻意保守BB嘅私隱，佢哋喺傳真度話：「目前我哋重未決定BB個名，而且今後亦唔打算將BB嘅名公諸於世。」對於幾時復出，菜菜子喺傳真中表示：「要睇吓身體狀況先，再慢慢考慮復出嘅工作。」
反町同菜菜子自合作日劇《麻辣教師》後拍拖，○一年二月拉埋天窗，今年二月菜菜子度過咗安定期先至公開懷孕六個月嘅消息，有傳佢哋已經喺神奈川逗子市內建咗個二千幾萬港元嘅新居，展開三人新世界。