午夜凶鈴事件，突然爆出個「成成」，各方咖哩啡，陸續大現身，重牽連埋信報股東曹仁超、南華證券女頭目張賽娥，重有一個自稱係關鍵人物嘅商人梁凱鷹，並由老曹再踢爆，曾去成成飯局，要求○七普選特首，成成大笑，話代為上達，好似暗示佢身份好重磅！
中方現時全力抹黑大飛，將大飛塑造為一個疑神疑鬼、神經緊張、頻頻抹冷汗、精神陷於崩潰邊緣嘅精神病人，而午夜凶鈴，只不過係一名朋友嘅「問候」。「成成」係大陸民間學者，全無官方性質。
為全力打飛，力證「成成」同官方無關，喉舌傳媒重不惜話連英文《中國日報》早前瘋狂炮轟李鵬飛嘅文革式大批判文章，原來好神迹地，係「民間外來投稿」，不代表中央立場咁話（批判李鵬飛開咪，重有大公文匯多篇「來論」，唔通呢三份全部係「民間報紙」，原來大陸一早就開放咗「民營辦報」？）
若然咁樣推論落去，話唔定有朝一日喺美國施壓之下，中台言歸於好，實現東東嘅以和為貴理想，大陸邀請陳水扁訪問北京，阿扁問胡溫：點解你哋國台辦主任罵足我咁多年？胡溫就會答：國台辦？哦，只不過係我哋外判嘅一個判頭公司啫，佢哋講嘢，唔代表中央嘅！
一個官場相識嘅論天氣型朋友多年冇見突然間深夜打電話嚟問候人妻女，跟住就要講吓節目問題，到咗大飛封咪之後，電話就唔響，「朋友」亦失蹤，又點到行走江湖三十年嘅大飛得出「佢想影響我做節目」嘅結論。
大飛嘅感受亦得到證實，呢位「成教授」，開記者會三句唔埋就燒到香港啲電台言論嗰一叠，話「烽煙」節目一面倒反政府，唔知官府電台收到之後，會唔會再將吳志森調落去午夜十二點，主持懷舊音樂節目，而張笑容生完仔，就另有任用，主持一個親子換尿片節目，然後又發表聲明話同成成記者會嘅訓話無關呢？
千祈唔好呀，唔係就陷國家於不義嘅啦。既然《中國日報》係民營報章，炮轟飛哥嘅維園阿伯式言論全部唔代表國家，阿董同中聯辦又發表聲明，話香港言論自由不受影響，香港嘅傳媒應該相信國家，相信胡溫，不但重金恭迎三大名嘴同朝開咪，重應該派埋記者去台灣專訪吓陳水扁、呂秀蓮㖭。
都係香港啲片商腦筋轉得快，有一套日本恐怖片即將上映，片名就叫做《鬼來電》，無論大飛係咪就快要入青山，八方謹祝全港市民時運高，千祈唔好接到啲「鬼來電」，掟話筒都掟唔切呀。
傳真︰2623-9278
電郵︰