通常球季結束咗後，喺夏天就會不斷有球員轉會嘅消息；不過，唔知係咪今夏有歐洲國家盃嘅關係，好多球員都要備戰，今夏反而教練過檔嘅消息吹得重勁。歐洲四大聯賽嘅勁旅都出現教練大執位。
首先，德甲班霸拜仁換咗前史特加教練馬加夫執教，馬加夫個位又由前多蒙特教練森馬頂咗，森馬個位就俾咗荷甲飛燕諾嘅教練尹馬維克。咁飛燕諾邊個教？咪好崇尚性感足球嘅荷蘭名宿古列治囉！
英超聯早輪有利物浦領隊侯利亞同球會「和平分手」，最新就係車路士炒咗領隊雲尼亞里。西甲聯冠軍華倫西亞嘅教練賓尼迪斯已啱啱同球會解約，睇嚟加盟「紅軍」機會大。
另外，西甲聯皇馬炒咗基羅斯，搵嚟金馬曹；意甲羅馬教練卡比路則做咗祖雲達斯教練，羅馬撬走帕馬爾教練柏蘭迪利……嘩！真係沒完沒了。
英格蘭中場碧咸有「萬人迷」嘅稱號，受歡迎唔在講，不過，喺最近英國BBC第5台（電台）搞嘅歐洲歷嚟最佳四十名足球員選舉中，佢竟然名落孫山，前四十名不入！反而法國中場施丹就當選第一名，而法國前鋒亨利亦入選。碧咸喺自己人搞嘅選舉都落選，實在冇面。
隨住赫德斯菲爾德喺英丙聯升班附加賽決賽，互射十二碼贏咗曼斯菲後，令今屆英格蘭三個組別憑升班附加賽攞到升班嘅球隊，都屬老牌球會。英甲升班附加賽贏出嘅係水晶宮，乙組附加賽勝出嘅就係白禮頓。雖然佢哋都俾英博彩公司睇淡，但我求大俠梗想佢哋有所作為喇！
意甲班霸AC米蘭今日會喺上海同中超上海申花交手。喺記者會中，AC嘅教練安察洛堤、隊長馬甸尼同埋中場雷哥斯達，都猛話中國足球水平高，又話佢哋唔係贏梗，令在場嘅人覺得好好笑。不過，既然AC喺香港都輸得畀傑志，或者AC又真係覺得中國足球水平高呢！
湖人雖然入咗總決賽，但近兩場主場都累死捧場客，而且重輸得好冤枉㖭！喺第四場湖人讓七分半，完場前重領先十分，點知加尼特射入一球三分，上盤即變下盤。今場竟又喺垃圾時間歷史重演，讓八分半嘅湖人完場前贏九分，希素最後射入一球三分，累上盤客又一次見財化水！