曾經全球招標嘅馬灣南部康樂旅遊用地，由於對入標者所提條件唔滿意，政府舊年收番。可能見自從有自由行之後，香港旅遊業幾乎成為拯救經濟嘅靈藥，為咗增加旅遊景點吸引旅客，聽講政府密密咁做緊嘢，遲啲就攞番呢塊地出嚟再招標。
政府為咗確保一定有人入標，聽講已經接觸過舊年入標兩家財團，睇吓佢哋重有冇興趣繼續玩。得番嚟嘅訊息好正面，對方不單止有興趣，而且重話好樂意去改善舊年嗰發展計劃，務求盡量達到政府要求。
當然啦，政府又點止問呢兩家財團呢，應該都有同時向一啲有實力嘅本地同外國財團探口風。相信大家下半年就會見塊地招標嘞。
呢塊康樂旅遊用地，佔地百三萬呎，舊年入標嘅財團，只得雪樂園公司同長江實業，其中長實以金庸武俠小說內容為旅遊發展主題，去爭呢塊地。
電腦科技一日千里，𠵱家只要一張光碟，已經包含唔少訊息。蘭西啱啱收到九龍倉一張光碟，裏面有公司核心物業相、尖沙嘴海港城同銅鑼灣時代廣場相，同埋公司一眾高層嘅相，當然唔少得主席吳光正啦。第日蘭西要用到佢哋嘅相，就方便好多，起碼多個選擇。佢哋果然識做，順便可以增加公司曝光率。
不過，蘭西覺得，若果發展商再加多啲資料，同不時更新，咁就最好嘞。其他上市公司好學嘢嘞，唔係就錯失宣傳機會。
蘭西之前提過，中原網上地圖，可以睇到住戶組群家庭每月收入情況，但成個大屋苑，唔可以一次過睇晒。
最近，聽中原集團張奕威講，已經可以做到淨係睇一個屋苑，或每一座嘅家庭月入數字，重可以用成個區或者全港做一個組群咁睇，大家可以比較到每座住宅嘅家庭月入，究竟同人哋相差幾多。
第日阿媽嫁女前，一上中原地圖，就可以大約估到男家搵到幾多錢嘞。
澳門政府就快成立「小額錢財」部，處理小額錢債糾紛，咁香港投資者過江買樓，遇到糾紛，都有途徑快啲解決。
美聯測量師行董事張一輝話，澳門凡涉法律糾紛，最少要搞四五年。若果有「小額錢財」部，就會快好多，估計半年就掂。
佢話，由於之前濠江睇樓團反應好，所以嚟緊三個禮拜日會再辦。上次睇完樓嘅，部份有意買，但要透過當地公司至得，所以美聯搞緊手續，喺當地成立新公司。到時最少有十個八個客幫襯，但暫時仍然得個睇字。
住宅樓市未因賣地理想而更上層樓，交投仍然淡靜，商廈市道一樣，部份諗住摸出單位賺錢嘅，為咗唔想上身，自然要諗計。
聽講，一個資深投資者，近排出貨態度積極咗好多，重加到三個佣，鼓勵代理努力搵客。市場人士話，個別單位達到呢個投資者心目中價錢成咗交，收到三個佣，不過，有幾多單，就一隻手數得晒。
呢個投資者近期摸出嘅商廈單位，只係比購入價高少少，賺到只夠畀佣。
蘭西
電郵地址：
