港股呢個浪由低位回升，噚日創出12253的高位，但午後乏力，倒跌收場，恒指挫92點，連升6日後，卒之跌番1日，投資者都鬆番一口氣。大市幾乎一口氣升咗1330點（中間只跌過1日），回一回，好正常，估計會調整兩三日，但幅度唔會大，整固完成後，有力再創今浪新高，初步目標係12500。
國企早段個勢好靚，特別係化工股，見到大行係咁掃。好似上海石化（338），一度掃到上2.625元，升0.15元，但午後轉弱，結果收2.4元，倒跌收場。上石化噚日啱啱上到頭肩底頸線水平就掉頭，短期料繼續整固，支持位在10日線同20日線的2.30元至2.35元，可趁低先買1注，到破位後再加碼，上升目標仍係3.25元。
除上石化外，燕化（325）、鎮化（1128）、馬鋼（323）、兗煤（1171）、中鋁（2600）同江銅（358）等都係大行大手吸納嘅對象，佢哋咁積極，必有智珠在握（莫非QDII有聲氣？），下一個升浪，呢一批國企會成為火車頭。
中國宏調開始見效，內地銀行亦要加快出售不良貸款嘅進度，銀建國際（171）由於已獲信達委託處理不良資產（目前做緊50億元），生意肯定會愈來愈多，「晒士」亦會愈來愈大，呢方面嘅收益，日後會以倍數增長。
信達資產管理直屬中國建設銀行，現時已入主銀建成為大股東，持有23%權益，擁有的不良資產總值逾4000億元人民幣，近日又從建行交接為數569億元的不良資產，加上現時又同建行及交通銀行傾緊以千億元計的收購計劃，成事機會應該好大，屆時信達手上的不良資產總值就高達9000億元人民幣，成為4大資產管理公司之首。
信達膨脹得咁快，銀建作為海外處理不良資產嘅平台，肯定係最大的受惠者。條數好易計，處理100億元，照往例計，佣金就有3.5億元，處理200億元就有7億元，家下銀建市值講緊都係25億元，前景真係好值得憧憬。
銀建股價近日反彈，升破長期下降軌後，受制於50日線，出現後抽，若升破1.72阻力，初步可向2.3元目標推進。
郭兆誠