經紀陳早前品題過展鴻控股（572），話佢獲大戶垂青。不過，股價不升反跌，令小初感到疑惑。
噚日早上展鴻股價下跌，下午停牌話搞批股，配股價幾乎係上市以來最低位，令小初恍然大悟。
根據經紀陳嘅路邊社消息，展鴻好似以先舊後新方式，每股0.65元，配售4000萬股，集資額約為2600萬元。
展鴻早市下跌4.2%，停牌前收0.68元，較配售價0.65元，只係折讓4.4%，但與上市以來最低位0.63元相距甚小。
經紀陳話，配股規模咁細，加上作價又平，重要就快有3.8仙息收，所以聽講冇乜貨散出街，好快就批完。如果貨源落在一兩個有實力的炒家手上，要炒上應該唔難。
另外，在早排跌市時，經紀陳曾提及一隻跌市奇葩辛康海聯（076），不經不覺股價已升至2.075元高位，成交重愈嚟愈大，噚日有成1017萬銀。
雖然公司即將改名做南海石油，但呢個藉口斷估唔係隻股屢創新高嘅原因。小初左諗右諗，但都係諗唔通。
慕容小初