董建華執政，成功令唔少人懷念殖民地時代嘅香港，前布政司鍾逸傑最近出版回憶錄，講述佢喺香港三十年為官嘅經歷，鍾sir話花咗兩年先完成，英文文章一流，內容包括佢處理過嘅多項重大政策，包括發展新市鎮、清拆九龍城寨、船民問題、公屋政策同代議政制，至於有冇禁止搶包山一事，大家可買本睇睇。
鍾sir又話佢好佩服飛哥，事關粒聲唔出繼續做人大好容易，同阿爺拜拜唔做人大，又封商台咪先至勇氣可嘉，佢更笑言自己都經常夜麻麻接到電話，不過唔係京官嘅凶鈴，而係記者嘅追魂call，好似佢唔使瞓咁。
鍾Sir以香港為家，回憶錄英文名為"FeelingtheStones"，意取自鄧伯伯講過，萬事都要「摸着石頭過河」，一步一步嚟，而譯者陶傑則譯為《石點頭》，象徵中國乃一塊頑石，好多西方人都懷着一番叫頑石點頭嘅壯志而來，但最終嚿頑石就唔點頭，反而佢哋認可中國嘅國情，唔可以同西方一樣享有人權，點頭稱道嘅係自己。
本新書中英文版現已出版，本周六下晝三點，商務喺尖沙嘴星光圖書中心有簽名會，作者同譯者都會出席。
傳真︰2623-9278
電郵︰