港股連升6日，恒指進帳859點之後，是日出現回吐，恒指調整92點，調整一吓好應該，大市已見底，過多一陣，又再升過，吼住市跌，趁低買Call輪。
直接做法，係喺低位買恒指Call輪，對象有9773同9788。9773喺9月尾到期，輪價12.4仙，溢價4.8%，槓桿率17.8倍，溢價唔算特別吸引，但勝在非常容易買賣，一日成交量504球，竟然高過發行量（388球），最啱炒出炒入，一日走幾轉都得，睇錯市跳車，幾秒鐘即可搞掂。9788到期日與9773相同，成交金額唔夠9773十分一，輪價11.3仙，溢價4.6%，抵過9773，槓桿率18.5倍。除非恒指未來升得好緊要，否則9788幾乎肯定跑贏9773。
中國人壽（2628）跌3格，收4.525元，如果再跌幾格，可以諗吓兜啲Call輪玩短線，但切忌太長情，對象係9822，9月尾夠鐘，輪價53仙，溢價11.2%，槓桿率8.5倍。炒國壽Call輪，因為溢價唔低，坐盤坐得太耐好蝕底。國壽好幾隻Call輪，最終多數冇好下場，例如9623，8月初到期，得兩個月壽命，行使價6.80元，正股相差2.275元，隻輪現價2.1仙，溢價51%，遲吓，將剩番1仙畀你睇，咪貪平。
新地（016）跌1元，再跌1-2元嘅話，低買Call輪9391，隻輪12月中夠鐘，輪價71仙，溢價8.4%，槓桿率9.2倍。
章盛