石修、陳文媛（BoBo）同張美妮日前去咗廣州鱷魚公園，為今晚出街嘅《娛樂大搜查》拍攝外景，面對公園裏邊有成十萬條大大細細嘅鱷魚，佢哋都唔驚，其中以石修最勇，所有近距離接觸鱷魚嘅拍攝，佢都代替兩個靚女上陣，BoBo同張美妮重即刻封咗石修係「鱷魚猛男」。
石修喺鱷魚訓練員「鱷魚釗」指導下，騎喺鱷魚身上，好威風吓，而BoBo同張美妮就喺佢側邊不停打氣支持。兩位靚女更將鱷魚BB抱喺手上，BoBo話：「鱷魚BB啲皮好嚡，但個肚就幾滑，感覺怪怪咁，我都好驚吓。」
不過張美妮因為貪靚而試食煮熟嘅鱷魚皮，佢話：「大廚話食咗鱷魚皮對皮膚好，食落嘅感覺好似食花膠咁，好滑好好味，我咪好大膽咁試吓囉。」
至於第一次食鱷魚肉嘅BoBo就話鱷魚肉嘅味道好似豬肉喎。
採訪：比華利
許冠傑（Sam）演唱會今個禮拜六就開鑼，近日佢忙於為個唱做準備，噚日凌晨一點幾，啲工作人員開始將啲音響器材送去紅館，而阿Sam同佢阿哥許冠英噚日下晝亦去咗九龍灣國際展貿中心綵排，嘉賓之一嘅鄭融亦有到場，佢重同記者講話自己未踩真正台板，所以綵排時一味靠估，都有啲擔心㗎。
許冠文噚日亦話終於講掂數，佢會喺阿Sam嘅演唱會入面開金口唱歌，由於得四句咁多，佢𠵱家正為唱邊四句而頭痛。
劉德華日前接受東風衛視訪問，問題當然離不開佢嘅事業同感情，以往每次一講到華仔背後嘅女人，佢就自自然然避重就輕，盡量保持低調。但係今次當主持人問佢朱麗倩係咪一直喺佢身邊守候時？華仔就話：「我覺得要人家等是一件很自私的事。不過如果有人執意要等我，那她就不要怪我！」唔知朱小姐聽完華仔呢一番話，會有乜反應呢？
任達華、李燦森同埋葛民輝噚日出席喺尖沙嘴舉行嘅「有線歐洲國家盃」記者會，任達華話佢同李燦森都會做客席主持，不過佢哋都係同啲觀眾玩吓遊戲，佢話：「我會講吓歷史，因為我覺得德國隊係睇咗我哋嘅三國演義之後，就用呢個策略去踢波。」
