慣於揸鑊鏟嘅大廚師、地產大炒家黃坤（馬場叫做黃煜坤）舊年買入一匹好馬，叫做「風雲小子」，認真厲害，跑完千四、千六米，竟然可以在二千四米揚威，擊敗夏佳理主席隻「駿河」、馬后「勝威旺」，得到「香港冠軍暨遮打盃」，喺三冠王大賽中，贏咗千六米董事盃及二千四米兩場，得到額外獎金二百萬元，連遮打盃冠軍獎金四百萬，黃師傅一日收六百粒。黃坤近年唔見佢在地產市場施展炒家神功，淨係喺馬場贏獎金，已經夠過癮。我哋睇吓黃師傅自夏佳理主席手上接過「遮打盃」嘅興奮表情，就知道佢興奮無比。
過往跑「遮打盃」，馬季已近尾聲，遮打盃冠軍就係長途馬王，所以遮打盃係重要賽事，馬迷重視。現在馬場吹淡風，氣氛麻麻啫，左丁山在星期日遲咗出門，裝一裝「城市論壇」講乜題目，原來係講病態賭徒，賭風蔓延。一睇台上講者，就知馬會會成為箭靶，亦知佢哋講嘅，係老生常談。十二點半入到馬瑒，一啲都唔塞，車位大把。你話賭風蔓延喎，馬迷一啲都唔覺，你問吓的士司機，佢哋更加覺得馬場賭風大倒退。
與一位接近馬會人士講起，馬會有冇鼓吹賭風，佢歎一聲：「不如你諗吓橋谷番起賽馬投注額。」咁又係，如果馬會可以谷得起賭風，馬場點解會少咗投注額呀！至於賭波咯喎，根本馬會唔使谷，波迷自然來，馬會唔接受投注嘅話，波迷咪一樣幫襯澳門、外圍、互聯網投注站！賭波之風，並非馬會帶起，馬會只係迎合市場需要而已。