淡友略為發力，港股即告回軟，全日跌92點，收報12105，成交111億元。地產股受壓較深，原因是恒生唱淡本港樓市，指本港住宅單位較住戶總數多之後，滙豐證券直頭話07年新增供應量實際較政府估計的7000個單位多幾倍，睇嚟政府要澄清一下，否則樓市有排呆滯。樓市唔怕加息，唔怕油價高，最怕供應大增。
哈啤（249）爭奪戰愈來愈刺激，安海斯雖未正式提出全購，但近期以每股5.58元增持6956.55萬股，持股量增至36%，突破30%的全購觸發點，安海斯將需提出全面收購，全購價至少每股5.58元，相當於03年PE47倍，遠高於粵啤（124）及青島啤（168），兩股急升逾5%，粵啤收1.88元，青啤收7.85元。
現時重未知SABMiller會否提價反擊，但若以每股5.58元作價，悉數將手上2.95億股賣畀安海斯，可套現逾16億元，則頗為和味，可用作擴展華潤啤酒業務。但最happy都係哈啤股東，可以坐喺度觀戰兼等收錢。哈啤噚日停牌。
國內頒布新法規，限制新汽車項目投資，照計新法規對駿威（203）及華晨（1114）有利，因為可減少競爭，防止汽車產能過剩。但唔知點解兩股同遭拋售，挫逾4%，真係令阿虎莫名其妙。
最近股市反彈，唔少公司即伸手抽水。噚日有8隻股份停牌，有3隻話配股或供股，其中展鴻（572）傳配售5000萬股，集資約3000萬元。萊福資本（901）亦話配股，聽講係自己友要晒，冇貨批出街，而麗豐（1125）則傳供股。
阿虎