柏金遜症，令阿嫻受盡十年折磨，更間接導致她與丈夫離婚，兒子Gary在單親環境中長大，讀書之餘要分神打理家務及照顧母親。Gary四出奔走，希望盡快籌足十六萬元手術費，好讓母親告別四肢終日顫抖及僵硬之苦。
今年十九歲的Gary，剛考完高級程度會考，現正等候放榜。回想數月來既要準備考試，又要打理家頭細務的日子，Gary不諱言頗為辛苦，成績亦或多或少受影響。
「平日買餸、掃地、清潔都係我做，另外，一啲稍為有危險性嘅嘢我一定唔會畀媽咪做，壓力同負擔都幾重，不過媽咪行動唔方便，冇辦法啦，我亦唔介意人哋知佢有呢個病。」Gary說。
母親阿嫻剛患柏金遜症時，Gary仍是一個甚麼都不懂的小孩。母親病後不久，不僅無法再做行政主任工作，家庭亦發生巨變，父親提出離婚，遺下母子相依為命。
阿嫻與兒子此後靠綜援金維生，母子咬緊牙關，度過不少困境。然而，阿嫻的病情近年顯著惡化，已達藥物無法控制地步。
「舊年有次同媽咪食完飯返屋企，過過吓馬路佢突然抽筋行唔郁，跟住跌低，當時有架重型貨車駛緊埋嚟，又就嚟轉紅燈，我要截停架車兼顧住媽咪，好彩最後冇事。」Gary猶有餘悸地說。
五十三歲的阿嫻表示，近來感到身體狀況愈來愈差，即使一日服足四、五次藥，效果仍未如理想，手腳經常抽筋及僵硬，令她痛不欲生。「我𠵱家一日食廿幾粒藥，醫生話唔可以再加，否則會有副作用，搞到個人語無倫次。醫生叫我快啲做手術，不過要十幾萬，我邊度有錢。」阿嫻歎道。
阿嫻的主診醫生曾建倫表示，阿嫻應盡快接受深部腦刺激手術，利用植入腦內的電極產生電流，控制身軀顫抖，手術後病情可望減輕六至七成，藥量亦最多可以減少一半。然而，病人要自資購買所需電極儀器，費用約需十六萬元。
「媽咪未病之前好叻，照顧得個屋企好好，我希望佢可以快啲做到手術，可以好番，唔想見佢咁辛苦。」侍母至孝的Gary說。
捐款編號：C1357
六十七歲的孔興，自八一年患上柏金遜病，在蘋果日報慈善基金善長捐助下，今年三月他順利接受深部腦刺激手術，身體震顫情況已改善，現正康復開展新生活。
暖流熱線
電話：29908688
傳真：23702192
電郵：
網址：
