英國駐港總領事柏聖文由北京嚟咗香港履新已有一段日子，噚晚佢喺位於深水灣嘅新官邸開非官式酒會，同新聞界友好敍舊，順便識吓新朋友。
原來總領事位於中半山雅賓利大廈嘅豪宅業權最近易手，柏聖文捨中環摩天大廈，租入深水灣住獨立屋，交通冇咁方便，但係環境冇得頂。
柏仔笑話，深水灣人傑地靈，對面山住咗全城首富李嘉誠同嘉道理，附近亦係好多領事嘅官邸，認真好風水。
八方多口問佢新業主係邊個？佢話咪霍英東囉。英政府同全國政協副主席租屋住，真有趣，不過，霍英東堅守立場，冇乜折扣，柏仔話租金同雅賓利有得比，但係就有歸家之感。
柏仔太太原是律師，個仔讀緊劍橋，個女就快升大學，柏仔個樣咁後生，大家估唔到佢已經仔大女大。
（圖）柏聖文話新居深水灣人傑地靈，好好風水。
傳真︰2623-9278
電郵︰