許冠傑（Sam）的復出個唱本周六開鑼，並於八月四日至十三日再加開十場，阿Sam演唱會主辦人丘亞葵表示，昨日信用卡優先訂飛十場合共賣出三萬張門票，成績驕人。丘亞葵預計本月十二日在紅館公開發售門票時，阿Sam會度橋報答歌迷支持。
許冠傑本周六在紅館舉行復出個唱，並於八月四日至十三日加開十場，原本阿Sam打算十月再下一城開十場演唱會，但因為要拍戲而被迫取消。
阿Sam八月的個唱昨日開始進行信用卡優先訂票，反應熱烈，演唱會主辦人丘亞葵表示，昨日只拿出每場三千張門票供信用卡用戶訂購，結果一日內賣出三萬張門票，成績驕人，不過大會希望預留多些門票供歌迷於本月中公開發售時搶購。
丘亞葵昨日在電話中說：「阿Sam八月演唱會今日開始信用卡優先訂飛，攞咗三萬張飛出嚟賣，一日賣晒，破咗單日紀錄，電訊網絡商重話啲線路都爆晒。」問丘亞葵演唱會門票何時公開發售，他說：「我哋去紅館入咗紙想六月十二日開始賣飛，咁啱嗰日係周六，更加方便歌迷。」問到阿Sam會否如上次一樣到紅館向歌迷獻唱，丘亞葵說：「阿Sam𠵱家度緊橋，佢唔排除有好多新意思畀歌迷，如果到時開心，阿Sam重話唔介意去勻港九賣票地方探歌迷㖭。」
而港台DJ周國豐昨日在節目《娛樂滿天星》中透露，阿Sam會在年底舉行慈善演唱會，周國豐說：「大概會喺聖誕節檔期，但到時唔係紅館，重可以坐幾萬人㖭，不過就重未公布得住。」
對此丘亞葵回應說：「其實好多嘢都重未落實，係好多人要搵阿Sam年底搞演唱會，但都未傾，阿Sam今日先為新戲《滿天神佛頌香江》試古裝造型。」此外，陳達志（Ba叔）昨日與旗下藝人侯莎莎在九龍灣試《滿》片造型。
採訪、攝影：比華利、駱華齡、馮美茵
