個市上晝唔得下晝得，恒指由跌126點變升81點，幾乎係由滙控（005）照晒。滙控收117.50元，有2元進帳，拉高恒指71.5點。
滙控Call輪，好多隻都係槓桿率勁爆，結果最大升幅嘅窩輪，有17隻係滙控Call輪，最勁嘅係9262，由4仙飛上8.8仙，升幅120%，有16球易手。隻輪7月到期，溢價5.4%，槓桿率133.5倍，賭呢隻，食得鹹魚抵得渴。1個月後，如果正股升唔夠5.5元以上，隻輪會變廢紙。
若然繼續睇好滙控，有幾隻輪可以諗吓。9076喺9月初到期，輪價97仙，溢價0.2%，槓桿率12.1倍。9783於9月尾到期，輪價88仙，溢價1.9%，槓桿率12.1倍。9640亦在9月初到期，輪價64仙，溢價3.3%，槓桿率18.4倍，呢件昨日彈升35%，升勢略嫌過急。9926明年2月到期，輪價1.16元，溢價2.5%，槓桿率10.1倍，呢件交投嫌疏。
滙控如果繼續向上郁，恒生（011）亦唔會跑輸大市。揀恒生Call輪炒，對象有9782同9706。前者9月尾到期，輪價43仙，溢價4.8%，槓桿率23.1倍。後者9月初到期，輪價27仙，溢價6.2%，槓桿率36.9倍。
全日拖低恒指最多嘅係和黃（013），收52元，跌75仙，恒指俾佢拖低10.4點。個市有勢，和黃遲早會跟大隊，執些少9833，今年10月中到期，輪價43仙，溢價8.3%，槓桿率12.1倍。
章盛