大市近排好番啲，即見多間公司拿拿臨搞批股，上周有魏橋紡織（2698），噚日又有物美商業（8277），集資金額都過億銀以上。
講真嗰句，唔趁家陣市況好轉搞批股，唔通要等大市回落先至搞？只係心急成咁，令小初對後市有多少保留。
查實好多細價股早排都動作多多，但因為市況唔好全部按兵不動，最近就紛紛再次行動。其中明倫集團（346）就剛剛公布，以4659萬元收購瀋陽一間石化燃料產品廠。噚日復牌，股價勁升21%，收0.30元，但成交就唔算多，只得857萬股，金額238萬銀。
小初記得舊年11月都炒過明倫一轉，當時股價最高炒過上去0.38元，但好快就回落，唔知係班炒家短癮定係冇水到？明倫當時好似想搞燃氣業務，但最終未有成事，今次轉搞石化燃料產品，亦對股價有新刺激。
經紀陳話，其實唔少證券界人士一早收到風話明倫有搞作，今次佢失驚無神急升，希望唔會好似上次咁短癮。
慕容小初