歌翠妮確絲著阿婆底褲Sell棉條娘爆

美國女星歌翠妮確絲（CourteneyCox），憑住主演人氣電視劇《老友記》，成為咗電視史上最高人工嘅電視女星之一。原來佢好似好多荷李活明星一樣，十幾年前初出道時，都曾經拍過一啲不堪回首嘅廣告。
話說當年歌翠妮二十歲都未夠，一心想加入娛樂圈，所以揀咗做模特兒為踏腳石。而歌翠妮入行接嘅第一份job，就係拍衞生棉條嘅廣告。本來拍女性用品嘅廣告就冇乜大不了，不過當時歌翠妮個樣「娘」到爆炸，佢着住嗰條阿婆式嘅底褲，再加上絲襪同legwarmer配合佢紮紮跳嘅形象，連我羅拉都覺得好惡心。

地位僅次畢嫂
喺個廣告入面，歌翠妮捧住盒衞生棉條，話用咗嗰隻牌子嘅棉條之後，令佢心情開朗。不過我羅拉見歌翠妮賣廣告時唧都唔笑，就知佢當時嘅演技有幾好啦！不過經過咁多年嘅鍛煉，歌翠妮嘅演技已得到大家嘅認同，好似喺《老友記》播完後，有網友選出最令人懷念嘅老友記，歌翠妮喺六位成員中排行第二，僅次於畢嫂珍妮花雅麗絲頓（JenniferAniston）咋！
講開珍妮花，佢話同老公畢彼特（BradPitt）維持夫妻關係全靠多幻想，佢重笑言老公同米雪菲花（MichellePfeiffer）上床都冇所謂。