近呢兩三個月幾間大廠都好似冇乜頂級手機見街，傳言就自然滿天飛，傳得最勁就係索記K700及諾記7610會喺6月賣街。論期待度梗係以諾記7610稍勝一籌，淨係個一百萬像素鏡頭已經令班手機佬（包括羅新基在內）流晒口水。而上星期有人問老闆有冇興趣入番部，部機點嚟當然冇人知，不過一開口就索價九千蚊，比預期行貨售價貴成倍，老闆當然要三思而後行，話晒一個唔該坐艇就真係搵鬼可憐囉。
諾記部時裝手機7200就愈玩愈紅，不過同樣以時裝手機起家嘅Xelibri，總共推出1至8號，歷時近13個月之後，日前就正式宣布停產Xelibri系列，的確令人感到可惜。Xelibri全線8款手機全球銷量達780,000部，不過佔整個西門子手機銷售量都唔夠2%，難怪要摺埋佢。話晒其8款超破格嘅設計令人大開眼界，咁就冇咗認真令人欷歔，鍾意儲手機嘅朋友就認真要行快步。
文：羅新基