梁家輝前晚喺尖沙嘴出席「童聲妙韻頌親恩」慈善音樂會，同二百個小朋友講親子故事。
黃秋生前日同傳媒講，炮轟演藝人協會冇幫會員謀福利，成日只顧聯誼，重話演協只不過係魚翅鮑魚團，食完放個屁就走。家輝聽過秋生呢番話後，佢就同記者講，佢話自己今年雖然唔再係理事，不過佢都幫個會做過唔少嘢，所以都好關心呢件事。家輝覺得秋生應該多啲返個會幫手，唔返就唔清楚會務。
家輝解釋演協係有聯誼性質，咁都係照顧退咗休嘅前輩，但亦都幫過唔少藝人追欠薪、訂合約、爭取到上電視台有車馬費咁，而且平時理事開會飲茶灌水都係自己出錢。
佢重建議秋生有唔明唔清楚嘅嘢，應該主動打電話返會問，只係同傳媒講，對個會唔公平，咁係冇盡會員責任，應該提出對個會有建設性嘅意見，而唔係同第三者講。
王家衞套《2046》喺康城參展，因為遲交片而搞到好狼狽，套戲首映後，有啲外國記者睇完部戲後，覺得部戲好似未拍完咁，所以有記者問王家衞康城嘅版本係咪最後一個版本，當時導演就話係，不過噚日台灣有報道話《2046》喺七月又要去泰國補戲，鞏俐到時都要去泰國補拍㖭，連馮仁昭都覺得呢部戲好似跑緊馬拉松，拍極都拍唔完。
陳小春噚日揸咗架價值九十幾萬嘅新車RangeRover到港台接受訪問，小春一向視許冠傑（阿Sam）為偶像，亦同佢份屬好友，所以小春話阿Sam開個唱要佢斟茶遞水，跪地趴地都冇問題，重話阿Sam做特首一定掂，不過講到佢冇份唱《04祝福你》，小春就酸溜溜話：「我有少少唔開心㗎，畀我唱兩個字都好呀。」
梁洛施（Isabella）同Boy'Z噚日出席「2004世界不吸煙日」活動，Isabella一向反對吸煙，不過佢嘅媽咪同偶像謝霆鋒都係煙民，Isabella話：「最好政府就立法冇煙賣，因為我媽咪食啲煙嘅焦油含量都幾勁。」Isabella亦勸偶像謝霆鋒慢慢戒煙，不過佢就話第時擇偶一定唔會揀煙民。
